ਡੀਜ਼ਲ ਖਰੀਦਣ ’ਤੇ ਲੱਗ ਸਕਦੀ ਹੈ ਲਿਮਟ!

ਦੇਸ਼ ਭਰ ਵਿੱਚ ਡੀਜ਼ਲ ਦੀ ਖਰੀਦ ਨੂੰ ਲੈ ਕੇ ਆਉਣ ਵਾਲੇ ਸਮੇਂ ਵਿੱਚ ਨਵਾਂ ਬਦਲਾਅ ਦੇਖਣ ਨੂੰ ਮਿਲ ਸਕਦਾ ਹੈ। ਜੇਕਰ ਤੁਸੀਂ ਪੈਟਰੋਲ ਪੰਪ ਤੋਂ ਵੱਡੀ ਮਾਤਰਾ ਵਿੱਚ ਡੀਜ਼ਲ ਖਰੀਦਦੇ ਹੋ ਤਾਂ ਤੁਹਾਡੇ ਲਈ ਖਰੀਦ ਦੀ ਮਾਤਰਾ ’ਤੇ ਸੀਮਾ ਲਗਾਈ ਜਾ ਸਕਦੀ ਹੈ। ਨਿੱਜੀ ਤੇਲ ਕੰਪਨੀਆਂ Jio-bp ਅਤੇ Nayara Energy ਵੱਲੋਂ ਕੁਝ ਪੰਪਾਂ ’ਤੇ ਪਹਿਲਾਂ ਹੀ ਡੀਜ਼ਲ ਦੀ ਵਿਕਰੀ ਸੀਮਤ ਕੀਤੀ ਗਈ ਹੈ।

ਹੁਣ Indian Oil Corporation (IOC), Bharat Petroleum (BPCL) ਅਤੇ Hindustan Petroleum (HPCL) ਵਰਗੀਆਂ ਸਰਕਾਰੀ ਤੇਲ ਕੰਪਨੀਆਂ ਵੀ ਡੀਜ਼ਲ ਦੀ ਵਿਕਰੀ ’ਤੇ ਮਾਤਰਾ ਸਬੰਧੀ ਸੀਮਾ ਲਗਾ ਸਕਦੀਆਂ ਹਨ। ਇਹ ਕਦਮ ਖਾਸ ਤੌਰ ’ਤੇ ਵੱਡੀ ਮਾਤਰਾ ਵਿੱਚ ਡੀਜ਼ਲ ਖਰੀਦਣ ਵਾਲੇ ਗਾਹਕਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਚੁੱਕਿਆ ਜਾ ਸਕਦਾ ਹੈ।

Jio-bp ਤੇ Nayara ਨੇ ਕਿੰਨੀ ਲਿਮਟ ਲਗਾਈ?

ਰਿਪੋਰਟਾਂ ਮੁਤਾਬਕ Jio-bp ਨੇ ਆਪਣੇ ਪੈਟਰੋਲ ਪੰਪਾਂ ’ਤੇ ਪ੍ਰਤੀ ਗਾਹਕ ਪ੍ਰਤੀ ਦਿਨ ਡੀਜ਼ਲ ਦੀ ਵਿਕਰੀ ਨੂੰ 50 ਲੀਟਰ ਤੱਕ ਸੀਮਤ ਕੀਤਾ ਹੈ। ਦੂਜੇ ਪਾਸੇ Nayara Energy ਨੇ ਵੱਖ-ਵੱਖ ਪੰਪਾਂ ਦੇ ਹਿਸਾਬ ਨਾਲ 70 ਤੋਂ 200 ਲੀਟਰ ਤੱਕ ਦੀ ਸੀਮਾ ਤੈਅ ਕੀਤੀ ਹੈ।

ਕੰਪਨੀਆਂ ਵੱਲੋਂ ਇਹ ਕਦਮ ਵੱਡੇ ਪੱਧਰ ’ਤੇ ਡੀਜ਼ਲ ਖਰੀਦਣ ਵਾਲੇ ਉਦਯੋਗਿਕ ਅਤੇ ਗੈਰ-ਆਵਾਜਾਈ ਗਾਹਕਾਂ ਦੀ ਵਧਦੀ ਮੰਗ ਦੇ ਮੱਦੇਨਜ਼ਰ ਚੁੱਕੇ ਗਏ ਹਨ।

ਪ੍ਰਚੂਨ ਤੇ ਥੋਕ ਡੀਜ਼ਲ ਦੀ ਕੀਮਤ ’ਚ ਵੱਡਾ ਅੰਤਰ

ਇਸ ਬਦਲਾਅ ਦਾ ਇੱਕ ਮੁੱਖ ਕਾਰਨ ਪ੍ਰਚੂਨ ਅਤੇ ਥੋਕ ਡੀਜ਼ਲ ਦੀਆਂ ਕੀਮਤਾਂ ਵਿੱਚ ਪੈਦਾ ਹੋਇਆ ਵੱਡਾ ਅੰਤਰ ਹੈ। ਰਿਪੋਰਟ ਮੁਤਾਬਕ ਮਈ ਤੋਂ ਪ੍ਰਚੂਨ ਡੀਜ਼ਲ ਦੀਆਂ ਕੀਮਤਾਂ ਵਿੱਚ ਵੱਡਾ ਬਦਲਾਅ ਨਹੀਂ ਹੋਇਆ, ਜਦਕਿ ਕੌਮਾਂਤਰੀ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋਇਆ ਹੈ।

ਇਸ ਦੇ ਉਲਟ, ਥੋਕ ਗਾਹਕਾਂ ਲਈ ਡੀਜ਼ਲ ਦੀ ਕੀਮਤ ਵਿੱਚ ਤੇਜ਼ੀ ਨਾਲ ਬਦਲਾਅ ਆਇਆ ਹੈ। ਦੋਵਾਂ ਕੀਮਤਾਂ ਵਿਚਕਾਰ ਵੱਡਾ ਅੰਤਰ ਹੋਣ ਕਾਰਨ ਵੱਡੇ ਗਾਹਕ ਪ੍ਰਚੂਨ ਪੈਟਰੋਲ ਪੰਪਾਂ ਤੋਂ ਸਸਤਾ ਡੀਜ਼ਲ ਖਰੀਦਣ ਵੱਲ ਵਧ ਰਹੇ ਹਨ।

ਵੱਡੀ ਮਾਤਰਾ ਵਿੱਚ ਡੀਜ਼ਲ ਖਰੀਦਣ ਨਾਲ ਕੀ ਸਮੱਸਿਆ?

ਪੈਟਰੋਲ ਪੰਪਾਂ ਕੋਲ ਡੀਜ਼ਲ ਸਟੋਰ ਕਰਨ ਦੀ ਸਮਰੱਥਾ ਸੀਮਤ ਹੁੰਦੀ ਹੈ। ਜੇਕਰ ਵੱਡੇ ਗਾਹਕ ਇੱਕੋ ਸਮੇਂ ਵੱਡੀ ਮਾਤਰਾ ਵਿੱਚ ਡੀਜ਼ਲ ਖਰੀਦਦੇ ਹਨ ਤਾਂ ਪੰਪ ਦਾ ਸਟਾਕ ਤੇਜ਼ੀ ਨਾਲ ਖਤਮ ਹੋ ਸਕਦਾ ਹੈ। ਨਵਾਂ ਸਟਾਕ ਪਹੁੰਚਣ ਵਿੱਚ ਵੀ ਸਮਾਂ ਲੱਗ ਸਕਦਾ ਹੈ।

ਇਸੇ ਕਾਰਨ ਕੰਪਨੀਆਂ ਦਾ ਕਹਿਣਾ ਹੈ ਕਿ ਵਿਕਰੀ ਦੀ ਮਾਤਰਾ ਨੂੰ ਸੀਮਤ ਕਰਨ ਦਾ ਉਦੇਸ਼ ਵੱਧ ਤੋਂ ਵੱਧ ਗਾਹਕਾਂ ਲਈ ਡੀਜ਼ਲ ਦੀ ਉਪਲਬਧਤਾ ਬਣਾਈ ਰੱਖਣਾ ਹੈ।

ਸਰਕਾਰੀ ਕੰਪਨੀਆਂ ਕੋਲ ਸਭ ਤੋਂ ਵੱਧ ਪੰਪ

ਭਾਰਤ ਵਿੱਚ ਕਰੀਬ 1.04 ਲੱਖ ਪੈਟਰੋਲ ਪੰਪ ਹਨ। ਇਨ੍ਹਾਂ ਵਿੱਚ ਵੱਡਾ ਹਿੱਸਾ ਸਰਕਾਰੀ ਤੇਲ ਕੰਪਨੀਆਂ ਦਾ ਹੈ। ਰਿਪੋਰਟ ਅਨੁਸਾਰ Indian Oil ਕੋਲ ਲਗਭਗ 43,289, BPCL ਕੋਲ 25,587 ਅਤੇ HPCL ਕੋਲ ਕਰੀਬ 25,238 ਆਊਟਲੈੱਟ ਹਨ। ਇਸ ਦੇ ਮੁਕਾਬਲੇ Jio-bp ਦੇ ਲਗਭਗ 2,227 ਅਤੇ Nayara Energy ਦੇ ਕਰੀਬ 7,105 ਆਊਟਲੈੱਟ ਹਨ।

ਜੇਕਰ ਪ੍ਰਚੂਨ ਅਤੇ ਥੋਕ ਡੀਜ਼ਲ ਦੀਆਂ ਕੀਮਤਾਂ ਵਿੱਚ ਇਹ ਅੰਤਰ ਜਾਰੀ ਰਹਿੰਦਾ ਹੈ ਤਾਂ ਸਰਕਾਰੀ ਕੰਪਨੀਆਂ ਦੇ ਪੰਪਾਂ ’ਤੇ ਵੀ ਵੱਡੇ ਗਾਹਕਾਂ ਵੱਲੋਂ ਵਾਧੂ ਮੰਗ ਆ ਸਕਦੀ ਹੈ।

ਆਮ ਗਾਹਕ ’ਤੇ ਕੀ ਹੋਵੇਗਾ ਅਸਰ?

ਫਿਲਹਾਲ ਅਜਿਹੀਆਂ ਸੀਮਾਵਾਂ ਦਾ ਮੁੱਖ ਪ੍ਰਭਾਵ ਵੱਡੀ ਮਾਤਰਾ ਵਿੱਚ ਡੀਜ਼ਲ ਖਰੀਦਣ ਵਾਲੇ ਗਾਹਕਾਂ ’ਤੇ ਪੈਣ ਦੀ ਸੰਭਾਵਨਾ ਹੈ। ਆਮ ਕਾਰ ਜਾਂ ਦੋਪਹੀਆ ਵਾਹਨ ਚਾਲਕਾਂ ਦੀ ਆਮ ਤੌਰ ’ਤੇ ਇੰਨੀ ਵੱਡੀ ਰੋਜ਼ਾਨਾ ਲੋੜ ਨਹੀਂ ਹੁੰਦੀ।

ਹਾਲਾਂਕਿ, ਜੇਕਰ ਪੈਟਰੋਲ ਪੰਪਾਂ ’ਤੇ ਵੱਡੀ ਮਾਤਰਾ ਵਿੱਚ ਡੀਜ਼ਲ ਦੀ ਖਰੀਦ ਜਾਰੀ ਰਹਿੰਦੀ ਹੈ ਤਾਂ ਕੰਪਨੀਆਂ ਵੱਲੋਂ ਵਿਕਰੀ ਦੀਆਂ ਸੀਮਾਵਾਂ ਹੋਰ ਸਖ਼ਤ ਕੀਤੀਆਂ ਜਾ ਸਕਦੀਆਂ ਹਨ। ਇਸ ਦਾ ਉਦੇਸ਼ ਪੰਪਾਂ ’ਤੇ ਸਟਾਕ ਬਣਾਈ ਰੱਖਣਾ ਅਤੇ ਆਮ ਖਪਤਕਾਰਾਂ ਲਈ ਈਂਧਨ ਦੀ ਉਪਲਬਧਤਾ ਯਕੀਨੀ ਕਰਨਾ ਹੋਵੇਗਾ।