ਜਨਤਾ 'ਤੇ ਮਹਿੰਗਾਈ ਦਾ ਡਬਲ ਅਟੈਕ: ਪਹਿਲਾਂ ਤੇਲ ਹੁਣ ਰੋਜ਼ਾਨਾ ਦਾ ਸਮਾਨ; ਸਾਬਣ-ਸਰਫ਼ ਦੀਆਂ ਕੀਮਤਾਂ ਨੂੰ ਲੱਗੇਗੀ ਅੱਗ

 ਨਵੀਂ ਦਿੱਲੀ: ਈਰਾਨ ਅਤੇ ਅਮਰੀਕਾ ਵਿਚਾਲੇ ਜਾਰੀ ਤਣਾਅ ਕਾਰਨ ਹੁਣ ਮਹਿੰਗਾਈ (Inflation Risk) ਦਾ ਖ਼ਤਰਾ ਵਧਦਾ ਨਜ਼ਰ ਆ ਰਿਹਾ ਹੈ। ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਵਿੱਚ ਵਾਧੇ ਤੋਂ ਬਾਅਦ ਹੁਣ ਸਾਬਣ, ਸਰਫ਼ (ਸੋਡਾ) ਅਤੇ ਖਾਣ ਵਾਲੇ ਤੇਲ ਦੀਆਂ ਕੀਮਤਾਂ ਵਿੱਚ ਵੀ ਉਛਾਲ ਆਉਣ ਵਾਲਾ ਹੈ। ਐਫਐਮਸੀਜੀ (FMCG) ਕੰਪਨੀਆਂ ਵਿੱਤੀ ਸਾਲ 2027 ਦੀ ਪਹਿਲੀ ਤਿਮਾਹੀ ਤੋਂ ਕੀਮਤਾਂ ਵਿੱਚ ਵਾਧਾ ਕਰਨ ਦੀ ਤਿਆਰੀ ਕਰ ਰਹੀਆਂ ਹਨ।

ਨੁਵਾਮਾ ਇੰਸਟੀਚਿਊਸ਼ਨਲ ਇਕੁਇਟੀਜ਼ ਦੀ ਇੱਕ ਰਿਪੋਰਟ ਅਨੁਸਾਰ, ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਤੇਜ਼ੀ ਅਤੇ ਰੁਪਏ ਦੀ ਕਮਜ਼ੋਰੀ ਕਾਰਨ ਉਤਪਾਦਨ ਲਾਗਤ (Input Cost) 'ਤੇ ਦਬਾਅ ਕਾਫੀ ਵਧ ਗਿਆ ਹੈ, ਜਿਸ ਕਾਰਨ ਹੁਣ ਕੀਮਤਾਂ ਨੂੰ ਸਥਿਰ ਰੱਖਣਾ ਮੁਸ਼ਕਲ ਹੋ ਰਿਹਾ ਹੈ।

ਕਿੰਨੀਆਂ ਵਧਣਗੀਆਂ ਕੀਮਤਾਂ?

ਬ੍ਰੋਕਰੇਜ ਫਰਮ ਦੀ ਇਸ ਰਿਪੋਰਟ ਵਿੱਚ ਅਨੁਮਾਨ ਲਗਾਇਆ ਗਿਆ ਹੈ ਕਿ: ਜੇਕਰ ਕੱਚੇ ਮਾਲ ਦੀ ਮਹਿੰਗਾਈ ਇਸੇ ਤਰ੍ਹਾਂ ਬਣੀ ਰਹੀ, ਤਾਂ ਵਿੱਤੀ ਸਾਲ 2027 ਦੀ ਪਹਿਲੀ ਤਿਮਾਹੀ ਵਿੱਚ ਕੀਮਤਾਂ ਵਿੱਚ ਘੱਟੋ-ਘੱਟ 3 ਤੋਂ 4 ਫੀਸਦੀ ਦਾ ਵਾਧਾ ਹੋਵੇਗਾ।

ਫਿਲਹਾਲ ਸਟਾਕ ਮੌਜੂਦ ਹੋਣ ਕਾਰਨ ਵਿੱਤੀ ਸਾਲ 2026 ਦੀ ਚੌਥੀ ਤਿਮਾਹੀ 'ਤੇ ਇਸ ਦਾ ਅਸਰ ਸੀਮਤ ਰਹੇਗਾ, ਪਰ ਨਵਾਂ ਸਟਾਕ ਆਉਂਦੇ ਹੀ ਕੀਮਤਾਂ ਵਧ ਜਾਣਗੀਆਂ।

ਰਿਪੋਰਟ ਵਿੱਚ ਹੋਰ ਕੀ ਕਿਹਾ ਗਿਆ?

ਨੁਵਾਮਾ ਦੀ ਰਿਪੋਰਟ ਅਨੁਸਾਰ, ਕੰਪਨੀਆਂ ਆਮ ਤੌਰ 'ਤੇ 30-45 ਦਿਨਾਂ ਦਾ ਕੱਚਾ ਮਾਲ ਅਤੇ ਤਿਆਰ ਮਾਲ ਦਾ ਸਟਾਕ ਰੱਖਦੀਆਂ ਹਨ। ਇਸ ਲਈ ਵਿੱਤੀ ਸਾਲ 2027 ਦੀ ਪਹਿਲੀ ਤਿਮਾਹੀ ਵਿੱਚ ਕੀਮਤਾਂ ਵਧਣ ਦੀ ਪੂਰੀ ਸੰਭਾਵਨਾ ਹੈ। ਖਾਸ ਕਰਕੇ ਪੇਂਟ, ਖਾਣ ਵਾਲੇ ਤੇਲ, ਸਾਬਣ ਅਤੇ ਡਿਟਰਜੈਂਟ ਬਣਾਉਣ ਵਾਲੀਆਂ ਕੰਪਨੀਆਂ 'ਤੇ ਸਭ ਤੋਂ ਵੱਧ ਦਬਾਅ ਹੈ।

ਪੈਕੇਜਿੰਗ ਦੀ ਲਾਗਤ ਵਿੱਚ ਵਾਧਾ

ਕੱਚੇ ਤੇਲ ਦੀਆਂ ਕੀਮਤਾਂ ਵਧਣ ਨਾਲ ਪੈਕੇਜਿੰਗ ਦਾ ਖਰਚਾ ਵੀ ਵਧ ਗਿਆ ਹੈ, ਜੋ ਕਿ ਕੰਪਨੀਆਂ ਦੇ ਕੁੱਲ ਖਰਚੇ ਦਾ 15 ਤੋਂ 20 ਫੀਸਦੀ ਹੁੰਦਾ ਹੈ। ਕੱਚਾ ਤੇਲ ਇਸ ਵੇਲੇ 100 ਅਮਰੀਕੀ ਡਾਲਰ ਪ੍ਰਤੀ ਬੈਰਲ ਦੇ ਆਸ-ਪਾਸ ਹੈ।

ਇਸ ਕਾਰਨ ਪੌਲੀਪ੍ਰੋਪਾਈਲੀਨ ਅਤੇ ਪੌਲੀਇਥੀਲੀਨ ਵਰਗੇ ਪੈਟਰੋ ਕੈਮੀਕਲ ਉਤਪਾਦਾਂ ਦੀ ਲਾਗਤ ਵਧ ਗਈ ਹੈ, ਜੋ ਪੈਕੇਜਿੰਗ ਵਿੱਚ ਵਰਤੇ ਜਾਂਦੇ ਹਨ। ਰਿਪੋਰਟ ਮੁਤਾਬਕ, "ਕੱਚੇ ਤੇਲ ਦੀਆਂ ਉੱਚੀਆਂ ਕੀਮਤਾਂ ਅਤੇ ਰੁਪਏ ਦੀ ਗਿਰਾਵਟ ਨੇ ਇਨਪੁਟ ਲਾਗਤ 'ਤੇ ਦਬਾਅ ਵਧਾਇਆ ਹੈ, ਮੁੱਖ ਤੌਰ 'ਤੇ ਪੈਕੇਜਿੰਗ ਕਾਰਨ, ਜੋ ਕੁੱਲ ਲਾਗਤ ਦਾ ਲਗਪਗ 20% ਹਿੱਸਾ ਹੈ।"