ਹਰਿਆਣਾ ਦਾ IIT ਰੋਪੜ ਨਾਲ ਸਮਝੌਤਾ, ਇੰਡਸਟਰੀ-ਓਰੀਐਂਟਿਡ ਤਕਨੀਕੀ ਸਿੱਖਿਆ ਤੇ ਰੋਜ਼ਗਾਰ ਯੋਗਤਾ ਨੂੰ ਮਿਲੇਗਾ ਹੁਲਾਰਾ

ਪੰਚਕੂਲਾ ’ਚ ਹੋਇਆ MoU ’ਤੇ ਦਸਤਖ਼ਤ

ਹਰਿਆਣਾ ਤਕਨੀਕੀ ਸਿੱਖਿਆ ਵਿਭਾਗ ਨੇ ਸ਼ੁੱਕਰਵਾਰ ਨੂੰ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਦੀ ਮੌਜੂਦਗੀ ਵਿੱਚ ਭਾਰਤੀ ਤਕਨਾਲੋਜੀ ਸੰਸਥਾਨ (IIT) ਰੋਪੜ ਨਾਲ ਸਮਝੌਤਾ ਗਿਆਪਨ (MoU) ’ਤੇ ਦਸਤਖ਼ਤ ਕੀਤੇ। ਇਹ ਸਮਝੌਤਾ ਸੈਕਟਰ-3, ਪੰਚਕੂਲਾ ਸਥਿਤ ਸਵਰਨ ਜਯੰਤੀ ਹਰਿਆਣਾ ਵਿੱਤੀ ਪ੍ਰਬੰਧਨ ਸੰਸਥਾਨ ਵਿੱਚ ਹੋਇਆ।

ਇਸ MoU ਦਾ ਮੁੱਖ ਉਦੇਸ਼ ਸੂਬੇ ਵਿੱਚ ਤਕਨੀਕੀ ਸਿੱਖਿਆ ਦੀ ਗੁਣਵੱਤਾ ਅਤੇ ਪ੍ਰਸੰਗਿਕਤਾ ਨੂੰ ਬਿਹਤਰ ਬਣਾਉਣ ਦੇ ਨਾਲ-ਨਾਲ ਵਿਦਿਆਰਥੀਆਂ ਦੀ ਰੋਜ਼ਗਾਰ ਯੋਗਤਾ ਵਧਾਉਣਾ ਹੈ।

ਤਕਨੀਕੀ ਸਿੱਖਿਆ ਦਾ ਮਜ਼ਬੂਤ ਇਕੋਸਿਸਟਮ ਤਿਆਰ ਕਰਨ ’ਤੇ ਜ਼ੋਰ

ਇਸ ਸਹਿਯੋਗ ਨੂੰ ਹਰਿਆਣਾ ਵਿੱਚ ਭਵਿੱਖ ਲਈ ਤਿਆਰ, ਨਵੀਨਤਾ-ਅਧਾਰਿਤ ਅਤੇ ਉਦਯੋਗ ਦੀਆਂ ਲੋੜਾਂ ਮੁਤਾਬਕ ਤਕਨੀਕੀ ਸਿੱਖਿਆ ਦਾ ਮਜ਼ਬੂਤ ਇਕੋਸਿਸਟਮ ਵਿਕਸਿਤ ਕਰਨ ਵੱਲ ਅਹਿਮ ਕਦਮ ਦੱਸਿਆ ਗਿਆ ਹੈ।

ਸਮਝੌਤੇ ਤਹਿਤ ਫੈਕਲਟੀ ਡਿਵੈਲਪਮੈਂਟ, ਲੈਬਾਂ ਦੇ ਆਧੁਨਿਕੀਕਰਨ, ਪਾਠਕ੍ਰਮ ਵਿੱਚ ਸੁਧਾਰ, ਨਵੀਨਤਾ, ਉਦਯਮਤਾ ਅਤੇ ਉਦਯੋਗ-ਕੇਂਦਰਿਤ ਹੁਨਰ ਵਿਕਾਸ ’ਤੇ ਕੰਮ ਕੀਤਾ ਜਾਵੇਗਾ। IIT ਰੋਪੜ ਲੈਬਾਂ ਦੇ ਆਧੁਨਿਕੀਕਰਨ ਅਤੇ ‘ਸੈਂਟਰ ਆਫ ਐਕਸੀਲੈਂਸ’ ਦੇ ਵਿਕਾਸ ਲਈ ਤਕਨੀਕੀ ਮਾਰਗਦਰਸ਼ਨ ਵੀ ਦੇਵੇਗਾ।

ਇਸ ਤੋਂ ਇਲਾਵਾ ਫੈਕਲਟੀ ਅਤੇ ਵਿਦਿਆਰਥੀਆਂ ਲਈ ਫੈਕਲਟੀ ਡਿਵੈਲਪਮੈਂਟ ਪ੍ਰੋਗਰਾਮ, ਸਰਟੀਫਿਕੇਟ ਕੋਰਸ, ਵਰਕਸ਼ਾਪ ਅਤੇ ਐਕਸਪੋਜ਼ਰ ਵਿਜ਼ਿਟ ਕਰਵਾਉਣ ਵਿੱਚ ਵੀ ਸਹਿਯੋਗ ਦਿੱਤਾ ਜਾਵੇਗਾ।

AI ਤੋਂ ਲੈ ਕੇ ਡਰੋਨ ਤੇ 3D ਪ੍ਰਿੰਟਿੰਗ ਤੱਕ ਇਨ੍ਹਾਂ ਤਕਨੀਕਾਂ ’ਤੇ ਫੋਕਸ

MoU ਤਹਿਤ ਕਈ ਉਭਰਦੀਆਂ ਤਕਨੀਕਾਂ ’ਤੇ ਵਿਸ਼ੇਸ਼ ਧਿਆਨ ਦੇਣ ਦੀ ਯੋਜਨਾ ਹੈ। ਇਨ੍ਹਾਂ ਵਿੱਚ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਅਤੇ ਡਾਟਾ ਐਨਾਲਿਟਿਕਸ, ਸਾਈਬਰ ਸਿਕਿਊਰਿਟੀ, ਰਿਨਿਊਏਬਲ ਐਨਰਜੀ, ਇਲੈਕਟ੍ਰਿਕ ਵ੍ਹੀਕਲਜ਼, ਬੈਟਰੀ ਟੈਕਨਾਲੋਜੀ, ਰੋਬੋਟਿਕਸ ਅਤੇ ਆਟੋਮੇਸ਼ਨ, ਡਰੋਨ ਟੈਕਨਾਲੋਜੀ ਅਤੇ ਐਡਿਟਿਵ ਮੈਨੂਫੈਕਚਰਿੰਗ/3D ਪ੍ਰਿੰਟਿੰਗ ਸ਼ਾਮਲ ਹਨ।

IIT ਰੋਪੜ ਤਕਨੀਕੀ ਸਿੱਖਿਆ ਦੇ ਪਾਠਕ੍ਰਮ ਵਿੱਚ ਲੋੜੀਂਦੇ ਬਦਲਾਅ ਅਤੇ ਆਉਟਕਮ-ਬੇਸਡ ਐਜੂਕੇਸ਼ਨ ਨੂੰ ਉਤਸ਼ਾਹਿਤ ਕਰਨ ਵਿੱਚ ਵੀ ਸਹਿਯੋਗ ਕਰੇਗਾ।

ਪੇਂਡੂ ਨੌਜਵਾਨਾਂ ਦੇ ਹੁਨਰ ਵਿਕਾਸ ’ਤੇ ਵੀ ਧਿਆਨ

ਇਸ ਪਹਿਲਕਦਮੀ ਤਹਿਤ ਪੇਂਡੂ ਨੌਜਵਾਨਾਂ ਦੇ ਹੁਨਰ ਵਿਕਾਸ, ਰੋਜ਼ਗਾਰ ਯੋਗਤਾ, ਉਦਯਮਤਾ ਅਤੇ ਸਵੈ-ਰੋਜ਼ਗਾਰ ਨੂੰ ਵੀ ਤਰਜੀਹ ਦੇਣ ਦੀ ਗੱਲ ਕਹੀ ਗਈ ਹੈ। ਇਸ ਨਾਲ ਵਿਦਿਆਰਥੀਆਂ ਅਤੇ ਡਿਪਲੋਮਾ ਤੇ ਡਿਗਰੀਧਾਰਕਾਂ ਨੂੰ ਆਧੁਨਿਕ ਤਕਨੀਕੀ ਗਿਆਨ ਅਤੇ ਨਵੀਨਤਾ ਦੇ ਇਕੋਸਿਸਟਮ ਨਾਲ ਜੋੜਨ ਵਿੱਚ ਮਦਦ ਮਿਲਣ ਦੀ ਉਮੀਦ ਹੈ।

ਉਦੇਸ਼ ਨੌਜਵਾਨਾਂ ਨੂੰ ਉਦਯੋਗ ਦੀਆਂ ਬਦਲਦੀਆਂ ਲੋੜਾਂ ਮੁਤਾਬਕ ਤਿਆਰ ਕਰਨਾ ਅਤੇ ਉਨ੍ਹਾਂ ਨੂੰ ਰੋਜ਼ਗਾਰ ਦੇ ਨਾਲ-ਨਾਲ ਉਦਯਮਤਾ ਦੇ ਨਵੇਂ ਮੌਕਿਆਂ ਨਾਲ ਜੋੜਨਾ ਹੈ।

ਪੰਜ ਸਾਲ ਲਈ ਲਾਗੂ ਰਹੇਗਾ ਸਮਝੌਤਾ

ਦੱਸਿਆ ਗਿਆ ਕਿ ਇਹ MoU ਸ਼ੁਰੂਆਤੀ ਤੌਰ ’ਤੇ ਪੰਜ ਸਾਲ ਲਈ ਪ੍ਰਭਾਵੀ ਰਹੇਗਾ ਅਤੇ ਦੋਵੇਂ ਧਿਰਾਂ ਦੀ ਆਪਸੀ ਸਹਿਮਤੀ ਨਾਲ ਇਸਨੂੰ ਅੱਗੇ ਵਧਾਇਆ ਜਾ ਸਕੇਗਾ।

ਸਮਝੌਤੇ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਲਾਗੂ ਕਰਨ ਲਈ ਨੋਡਲ ਅਧਿਕਾਰੀਆਂ ਦੀ ਨਿਯੁਕਤੀ ਕੀਤੀ ਜਾਵੇਗੀ ਅਤੇ ਇੱਕ ਸਾਂਝੀ ਕੋਆਰਡੀਨੇਸ਼ਨ ਕਮੇਟੀ ਦਾ ਗਠਨ ਕੀਤਾ ਜਾਵੇਗਾ। ਇਸ ਸਹਿਯੋਗ ਕਾਰਨ ਕਿਸੇ ਵੀ ਧਿਰ ’ਤੇ ਕੋਈ ਵਾਧੂ ਵਿੱਤੀ ਬੋਝ ਨਹੀਂ ਪਵੇਗਾ।

ਇਹ ਅਧਿਕਾਰੀ ਰਹੇ ਮੌਜੂਦ

ਇਸ ਮੌਕੇ ਤਕਨੀਕੀ ਸਿੱਖਿਆ ਵਿਭਾਗ ਦੇ ਵਧੀਕ ਡਾਇਰੈਕਟਰ ਰਾਜੇਸ਼ ਅਗਰਵਾਲ, ਸੰਯੁਕਤ ਡਾਇਰੈਕਟਰ ਡਾ. ਹਰੀਸ਼ ਗੁਪਤਾ, ਮਧੁ ਮਾਨ, ਨਰਿੰਦਰ ਪਾਲ ਅਤੇ ਤਕਨੀਕੀ ਸਿੱਖਿਆ ਵਿਭਾਗ ਦੀ ਡਿਪਟੀ ਡਾਇਰੈਕਟਰ (ਅਕੈਡਮਿਕਸ) ਅਕਸ਼ਿਤਾ ਗੁਪਤਾ ਮੌਜੂਦ ਰਹੇ।

ਇਸ ਤੋਂ ਇਲਾਵਾ IIT ਰੋਪੜ ਦੇ ਡੀਨ (ਅਕੈਡਮਿਕਸ) ਪ੍ਰੋ. ਸਾਰੰਗ ਗੁਮਫੇਕਰ ਸਮੇਤ ਹੋਰ ਅਧਿਕਾਰੀ ਅਤੇ ਨੁਮਾਇੰਦੇ ਵੀ ਇਸ ਮੌਕੇ ਹਾਜ਼ਰ ਸਨ।