LPG New Rule: 1 ਅਕਤੂਬਰ ਤੋਂ 2.47 ਕਰੋੜ ਗਾਹਕਾਂ ਲਈ ਬਦਲ ਜਾਣਗੇ LPG ਬੁਕਿੰਗ ਦੇ ਨਿਯਮ
LPG Subsidy Rule: 1 ਅਕਤੂਬਰ 2026 ਤੋਂ ਸਬਸਿਡੀ ਵਾਲਾ ਘਰੇਲੂ LPG ਸਿਲੰਡਰ ਬੁੱਕ ਕਰਨ ਲਈ Biometric Aadhaar Authentication (BAA) ਪੂਰਾ ਕਰਨਾ ਜ਼ਰੂਰੀ ਹੋਵੇਗਾ। ਸਰਕਾਰੀ ਅੰਕੜਿਆਂ ਮੁਤਾਬਕ ਕਰੀਬ 27.43 ਕਰੋੜ LPG ਉਪਭੋਗਤਾ ਪਹਿਲਾਂ ਹੀ ਤਸਦੀਕ ਕਰਵਾ ਚੁੱਕੇ ਹਨ, ਜਦਕਿ ਲਗਭਗ 2.47 ਕਰੋੜ ਉਪਭੋਗਤਾਵਾਂ ਦੀ ਆਧਾਰ ਤਸਦੀਕ ਬਾਕੀ ਹੈ।
ਨਵੀਂ ਦਿੱਲੀ: ਘਰੇਲੂ LPG ਸਿਲੰਡਰ ਦੀ ਬੁਕਿੰਗ ਅਤੇ ਸਬਸਿਡੀ ਨਾਲ ਜੁੜੇ ਨਿਯਮਾਂ ਵਿੱਚ 1 ਅਕਤੂਬਰ 2026 ਤੋਂ ਅਹਿਮ ਬਦਲਾਅ ਹੋਣ ਜਾ ਰਿਹਾ ਹੈ। ਸਰਕਾਰ ਵੱਲੋਂ ਜਾਰੀ ਨਿਰਦੇਸ਼ਾਂ ਮੁਤਾਬਕ ਸਬਸਿਡੀ ਵਾਲਾ ਘਰੇਲੂ LPG ਸਿਲੰਡਰ ਲੈਣ ਲਈ Biometric Aadhaar Authentication (BAA) ਪੂਰਾ ਹੋਣਾ ਲਾਜ਼ਮੀ ਹੋਵੇਗਾ।
ਸਰਕਾਰੀ ਅੰਕੜਿਆਂ ਅਨੁਸਾਰ ਦੇਸ਼ ਦੇ ਸਰਗਰਮ ਘਰੇਲੂ LPG ਉਪਭੋਗਤਾਵਾਂ ਵਿੱਚੋਂ 27.43 ਕਰੋੜ, ਯਾਨੀ 89.9 ਫੀਸਦੀ, ਪਹਿਲਾਂ ਹੀ ਬਾਇਓਮੈਟ੍ਰਿਕ ਆਧਾਰ ਤਸਦੀਕ ਪੂਰੀ ਕਰ ਚੁੱਕੇ ਹਨ। ਇਨ੍ਹਾਂ ਗਾਹਕਾਂ ਨੂੰ 1 ਅਕਤੂਬਰ ਤੋਂ ਕੋਈ ਵਾਧੂ ਪ੍ਰਕਿਰਿਆ ਨਹੀਂ ਕਰਨੀ ਪਵੇਗੀ। ਦੂਜੇ ਪਾਸੇ ਲਗਭਗ 2.47 ਕਰੋੜ ਉਪਭੋਗਤਾਵਾਂ ਦੀ BAA ਪ੍ਰਕਿਰਿਆ ਅਜੇ ਬਾਕੀ ਹੈ।
ਕਿਵੇਂ ਕਰਵਾ ਸਕਦੇ ਹੋ ਆਧਾਰ ਦੀ ਤਸਦੀਕ?
ਜਿਨ੍ਹਾਂ ਗਾਹਕਾਂ ਨੇ ਅਜੇ ਤੱਕ ਬਾਇਓਮੈਟ੍ਰਿਕ ਆਧਾਰ ਆਥੈਂਟੀਕੇਸ਼ਨ ਨਹੀਂ ਕਰਵਾਈ, ਉਹ ਕਈ ਤਰੀਕਿਆਂ ਰਾਹੀਂ ਇਹ ਪ੍ਰਕਿਰਿਆ ਪੂਰੀ ਕਰ ਸਕਦੇ ਹਨ।
LPG ਸਿਲੰਡਰ ਦੀ ਡਿਲੀਵਰੀ ਸਮੇਂ ਡਿਲੀਵਰੀ ਕਰਮਚਾਰੀ ਦੇ ਮੋਬਾਈਲ ਐਪ ਰਾਹੀਂ।
LPG ਡਿਸਟ੍ਰੀਬਿਊਟਰ ਦੇ ਸ਼ੋਰੂਮ ’ਤੇ ਜਾ ਕੇ।
ਸਬੰਧਤ Oil Marketing Company (OMC) ਦੇ ਮੋਬਾਈਲ ਐਪ ਰਾਹੀਂ।
Indane ਗਾਹਕ IndianOil ONE ਐਪ ਰਾਹੀਂ।
Bharatgas ਗਾਹਕ HelloBPCL ਐਪ ਰਾਹੀਂ।
HP Gas ਗਾਹਕ HP PAY ਐਪ ਰਾਹੀਂ ਆਧਾਰ ਤਸਦੀਕ ਕਰ ਸਕਦੇ ਹਨ।
ਸਬਸਿਡੀ ਨਹੀਂ ਚਾਹੁੰਦੇ ਤਾਂ ਕੀ ਹੋਵੇਗਾ?
ਜੇ ਕੋਈ ਗਾਹਕ ਬਾਇਓਮੈਟ੍ਰਿਕ ਆਧਾਰ ਤਸਦੀਕ ਨਹੀਂ ਕਰਵਾਉਣਾ ਚਾਹੁੰਦਾ ਅਤੇ LPG ਬਿਨਾਂ ਸਬਸਿਡੀ ਲੈਣਾ ਚਾਹੁੰਦਾ ਹੈ ਤਾਂ ਉਸ ਲਈ ਵੀ ਵਿਕਲਪ ਮੌਜੂਦ ਰਹੇਗਾ। ਅਜਿਹੇ ਗਾਹਕ ਆਪਣੀ OMC ਦੇ ਡਿਜੀਟਲ ਚੈਨਲ, ਮੋਬਾਈਲ ਐਪ, WhatsApp ਚੈਟਬੋਟ ਜਾਂ IVRS ਰਾਹੀਂ ਆਪਣੀ ਪਸੰਦ ਦਰਜ ਕਰ ਸਕਦੇ ਹਨ।
ਇਸ ਤੋਂ ਬਾਅਦ ਉਨ੍ਹਾਂ ਨੂੰ LPG ਬਾਜ਼ਾਰ ਕੀਮਤ ’ਤੇ, ਬਿਨਾਂ ਸਬਸਿਡੀ ਦੇ ਮਿਲੇਗਾ। 5 ਕਿਲੋ ਜਾਂ 10 ਕਿਲੋ ਦੇ ਸਿਲੰਡਰ ਸਥਾਨਕ ਉਪਲਬਧਤਾ ਦੇ ਆਧਾਰ ’ਤੇ ਮਿਲ ਸਕਦੇ ਹਨ।
ਪਹਿਲਾਂ ਵੀ ਵਧਾਈ ਜਾ ਚੁੱਕੀ ਹੈ ਡੈੱਡਲਾਈਨ
BAA ਪੂਰਾ ਕਰਨ ਦੀ ਸ਼ੁਰੂਆਤੀ ਸਮਾਂ-ਸੀਮਾ 30 ਜੂਨ 2026 ਰੱਖੀ ਗਈ ਸੀ। ਬਾਅਦ ਵਿੱਚ ਗਾਹਕਾਂ ਨੂੰ ਵਾਧੂ ਸਮਾਂ ਦੇਣ ਲਈ ਡੈੱਡਲਾਈਨ ਕਈ ਵਾਰ ਵਧਾਈ ਗਈ ਅਤੇ ਆਖਰੀ ਮਿਤੀ 14 ਸਤੰਬਰ 2026 ਰੱਖੀ ਗਈ ਸੀ।
ਸਰਕਾਰ ਮੁਤਾਬਕ ਅਕਤੂਬਰ 2023 ਤੋਂ ਚੱਲ ਰਹੇ ਆਧਾਰ ਆਥੈਂਟੀਕੇਸ਼ਨ ਅਭਿਆਨ ਤਹਿਤ ਗਾਹਕਾਂ ਨੂੰ 12 ਕਰੋੜ ਤੋਂ ਵੱਧ SMS ਅਤੇ WhatsApp ਸੰਦੇਸ਼ ਭੇਜੇ ਜਾ ਚੁੱਕੇ ਹਨ। LPG ਡਿਸਟ੍ਰੀਬਿਊਟਰਾਂ, ਡਿਲੀਵਰੀ ਕਰਮਚਾਰੀਆਂ ਅਤੇ ਵਿਸ਼ੇਸ਼ ਕੈਂਪਾਂ ਰਾਹੀਂ ਵੀ ਲੋਕਾਂ ਨੂੰ ਤਸਦੀਕ ਪੂਰੀ ਕਰਨ ਲਈ ਜਾਗਰੂਕ ਕੀਤਾ ਗਿਆ।
LPG ਸਬਸਿਡੀ ਦੀ ਰਕਮ ਵਿੱਚ ਵੀ ਬਦਲਾਅ
ਸਰਕਾਰ ਦੇ ਅੰਕੜਿਆਂ ਮੁਤਾਬਕ ਸਤੰਬਰ 2026 ਵਿੱਚ 14.2 ਕਿਲੋ ਦੇ ਘਰੇਲੂ LPG ਸਿਲੰਡਰ ਦੀ ਅਸਲ ਲਾਗਤ ਅਤੇ ਵਿਕਰੀ ਮੁੱਲ ਵਿਚਕਾਰ ਅੰਤਰ ਨਾਲ ਜੁੜੀ ਅੰਤਰਨਿਹਿਤ ਸਬਸਿਡੀ ਲਗਭਗ 210 ਰੁਪਏ ਪ੍ਰਤੀ ਸਿਲੰਡਰ ਹੈ। ਜੂਨ 2026 ਵਿੱਚ ਇਹ ਰਕਮ ਕਰੀਬ 721 ਰੁਪਏ ਤੱਕ ਪਹੁੰਚ ਗਈ ਸੀ।
ਸਰਕਾਰ ਨੇ ਦੱਸਿਆ ਕਿ FY 2022-23 ਵਿੱਚ LPG ਸਬਸਿਡੀ ਲਈ OMCs ਨੂੰ 22,000 ਕਰੋੜ ਰੁਪਏ ਦਾ ਮੁਆਵਜ਼ਾ ਦਿੱਤਾ ਗਿਆ ਸੀ, ਜਦਕਿ FY 2025-26 ਅਤੇ FY 2026-27 ਵਿੱਚ 30,000 ਕਰੋੜ ਰੁਪਏ ਦਿੱਤੇ ਜਾ ਰਹੇ ਹਨ।
ਗਾਹਕਾਂ ਲਈ ਕੀ ਜ਼ਰੂਰੀ ਹੈ?
ਜਿਨ੍ਹਾਂ LPG ਗਾਹਕਾਂ ਦੀ ਬਾਇਓਮੈਟ੍ਰਿਕ ਆਧਾਰ ਤਸਦੀਕ ਅਜੇ ਪੂਰੀ ਨਹੀਂ ਹੋਈ, ਉਨ੍ਹਾਂ ਨੂੰ 1 ਅਕਤੂਬਰ ਤੋਂ ਪਹਿਲਾਂ ਇਹ ਪ੍ਰਕਿਰਿਆ ਪੂਰੀ ਕਰਨ ਦੀ ਸਲਾਹ ਦਿੱਤੀ ਗਈ ਹੈ। LPG ਸੇਵਾਵਾਂ ਸਬੰਧੀ ਕਿਸੇ ਵੀ ਸਵਾਲ ਲਈ ਟੋਲ-ਫ੍ਰੀ ਹੈਲਪਲਾਈਨ 1800 2333 555 ’ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।