ਹਰਿਆਣਾ ’ਚ ਭ੍ਰਿਸ਼ਟਾਚਾਰ ਦੀ ਸ਼ਿਕਾਇਤ ਹੁਣ ਇੱਕ ਟੱਚ ’ਤੇ, CM ਸੈਣੀ ਨੇ ਲਾਂਚ ਕੀਤਾ ‘ਸਤਰਕ-ਹਰਿਆਣਾ’ ਐਪ

ਹਰਿਆਣਾ ਸਰਕਾਰ ਨੇ ਭ੍ਰਿਸ਼ਟਾਚਾਰ ਖ਼ਿਲਾਫ਼ ਸ਼ਿਕਾਇਤਾਂ ਦਰਜ ਕਰਵਾਉਣ ਦੀ ਪ੍ਰਕਿਰਿਆ ਨੂੰ ਹੋਰ ਆਸਾਨ ਬਣਾਉਣ ਲਈ ਡਿਜੀਟਲ ਪਹਿਲ ਕੀਤੀ ਹੈ। ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਵੀਰਵਾਰ ਨੂੰ ਹਰਿਆਣਾ ਸਕੱਤਰੇਤ ਤੋਂ ‘ਸਤਰਕ-ਹਰਿਆਣਾ’ ਮੋਬਾਈਲ ਐਪ ਲਾਂਚ ਕੀਤਾ। ਇਸ ਐਪ ਰਾਹੀਂ ਨਾਗਰਿਕ ਭ੍ਰਿਸ਼ਟਾਚਾਰ ਨਾਲ ਸਬੰਧਤ ਸ਼ਿਕਾਇਤ ਜਾਂ ਜਾਣਕਾਰੀ ਸਿੱਧੇ ਸਟੇਟ ਵਿਜੀਲੈਂਸ ਐਂਡ ਐਂਟੀ-ਕਰੱਪਸ਼ਨ ਬਿਊਰੋ (SV&ACB), ਹਰਿਆਣਾ ਤੱਕ ਪਹੁੰਚਾ ਸਕਣਗੇ।

ਇੱਕ ਟੱਚ ’ਤੇ ACB ਹੈਲਪਲਾਈਨ ਨਾਲ ਸੰਪਰਕ

ਐਪ ਦੀ ਇੱਕ ਮੁੱਖ ਸਹੂਲਤ ਇਹ ਹੈ ਕਿ ਲੋਕਾਂ ਨੂੰ SV&ACB ਦਾ ਹੈਲਪਲਾਈਨ ਨੰਬਰ ਯਾਦ ਰੱਖਣ ਦੀ ਲੋੜ ਨਹੀਂ ਪਵੇਗੀ। ਐਪ ਵਿੱਚ ਦਿੱਤੀ ਹੈਲਪਲਾਈਨ ਸਹੂਲਤ ’ਤੇ ਇੱਕ ਟੱਚ ਕਰਕੇ ਨਾਗਰਿਕ ਸਿੱਧੇ ਬਿਊਰੋ ਨਾਲ ਸੰਪਰਕ ਕਰ ਸਕਣਗੇ।

ਇਸ ਤੋਂ ਇਲਾਵਾ ਲੋਕ ਭ੍ਰਿਸ਼ਟਾਚਾਰ ਨਾਲ ਸਬੰਧਤ ਫੋਟੋ, ਵੀਡੀਓ, ਆਡੀਓ ਜਾਂ ਹੋਰ ਡਿਜੀਟਲ ਸਬੂਤ ਵੀ ਐਪ ਰਾਹੀਂ ਸਾਂਝੇ ਕਰ ਸਕਣਗੇ।

ਤੁਰੰਤ ਕਾਰਵਾਈ ਨਾ ਚਾਹੁਣ ਵਾਲੇ ਵੀ ਦੇ ਸਕਣਗੇ ਜਾਣਕਾਰੀ

ਜੇਕਰ ਕਿਸੇ ਵਿਅਕਤੀ ਕੋਲ ਭ੍ਰਿਸ਼ਟਾਚਾਰ ਨਾਲ ਸਬੰਧਤ ਕੋਈ ਮਹੱਤਵਪੂਰਨ ਜਾਣਕਾਰੀ ਹੈ, ਪਰ ਉਹ ਤੁਰੰਤ ਕਿਸੇ ਵਿਅਕਤੀ ਖ਼ਿਲਾਫ਼ ਕਾਰਵਾਈ ਨਹੀਂ ਚਾਹੁੰਦਾ, ਤਾਂ ਉਹ ਜਾਣਕਾਰੀ ਵੀ ਐਪ ਰਾਹੀਂ SV&ACB ਤੱਕ ਪਹੁੰਚਾਈ ਜਾ ਸਕੇਗੀ। ਸਰਕਾਰੀ ਜਾਣਕਾਰੀ ਮੁਤਾਬਕ ਅਜਿਹੀ ਜਾਣਕਾਰੀ ਦੀ ਗੋਪਨੀਯਤਾ ਦਾ ਧਿਆਨ ਰੱਖਿਆ ਜਾਵੇਗਾ ਅਤੇ ਇਸ ਨਾਲ ਭ੍ਰਿਸ਼ਟਾਚਾਰ ਸਬੰਧੀ ਜਾਣਕਾਰੀਆਂ ਦਾ ਡਿਜੀਟਲ ਡਾਟਾਬੇਸ ਤਿਆਰ ਕਰਨ ਵਿੱਚ ਮਦਦ ਮਿਲੇਗੀ।

23 ਜ਼ਿਲ੍ਹਿਆਂ ਦੇ ACB ਅਧਿਕਾਰੀਆਂ ਦੀ ਜਾਣਕਾਰੀ

‘ਸਤਰਕ-ਹਰਿਆਣਾ’ ਐਪ ਵਿੱਚ ਹਰਿਆਣਾ ਦੇ ਸਾਰੇ 23 ਜ਼ਿਲ੍ਹਿਆਂ ਨੂੰ ਜੋੜਿਆ ਗਿਆ ਹੈ। ਜੇਕਰ ਕੋਈ ਵਿਅਕਤੀ ਕਿਸੇ ਹੋਰ ਜ਼ਿਲ੍ਹੇ ਵਿੱਚ ਹੈ ਅਤੇ ਉੱਥੇ ਭ੍ਰਿਸ਼ਟਾਚਾਰ ਸਬੰਧੀ ਸ਼ਿਕਾਇਤ ਦੇਣਾ ਚਾਹੁੰਦਾ ਹੈ ਤਾਂ ਐਪ ਵਿੱਚ ਸਬੰਧਤ ਜ਼ਿਲ੍ਹਾ ਚੁਣ ਕੇ ਉੱਥੋਂ ਦੇ SV&ACB ਇੰਚਾਰਜ ਦਾ ਨਾਮ ਅਤੇ ਮੋਬਾਈਲ ਨੰਬਰ ਦੇਖਿਆ ਜਾ ਸਕਦਾ ਹੈ।

ਇਸ ਦੇ ਨਾਲ ਗੂਗਲ ਲੋਕੇਸ਼ਨ ਰਾਹੀਂ ਸਬੰਧਤ ACB ਦਫ਼ਤਰ ਦੀ ਜਗ੍ਹਾ ਅਤੇ ਉੱਥੇ ਪਹੁੰਚਣ ਦਾ ਰਸਤਾ ਵੀ ਦੇਖਿਆ ਜਾ ਸਕੇਗਾ।

ACB ਅਧਿਕਾਰੀ ਖ਼ਿਲਾਫ਼ ਸ਼ਿਕਾਇਤ ਦੀ ਵੀ ਸਹੂਲਤ

ਜੇਕਰ ਕਿਸੇ ਨਾਗਰਿਕ ਨੂੰ SV&ACB ਦੇ ਕਿਸੇ ਅਧਿਕਾਰੀ ਜਾਂ ਕਰਮਚਾਰੀ ਦੇ ਵਿਵਹਾਰ ਸਬੰਧੀ ਸ਼ਿਕਾਇਤ ਹੋਵੇ ਤਾਂ ਐਪ ਰਾਹੀਂ ਸਬੰਧਤ ਸੀਨੀਅਰ ਅਧਿਕਾਰੀ ਤੱਕ ਪਹੁੰਚ ਕੀਤੀ ਜਾ ਸਕੇਗੀ। ਇਸ ਵਿੱਚ ਸਬੰਧਤ ਪੁਲੀਸ ਸੁਪਰਡੈਂਟ ਦਾ ਨਾਮ, ਮੋਬਾਈਲ ਨੰਬਰ, ਦਫ਼ਤਰ ਦੀ ਲੋਕੇਸ਼ਨ ਅਤੇ ਉੱਥੇ ਪਹੁੰਚਣ ਦਾ ਰਸਤਾ ਦੇਖਣ ਦੀ ਸਹੂਲਤ ਵੀ ਦਿੱਤੀ ਗਈ ਹੈ।

ਉਪਲਬਧ FIR ਦੀ ਕਾਪੀ ਵੀ ਕਰ ਸਕਣਗੇ ਡਾਊਨਲੋਡ

ਐਪ ਰਾਹੀਂ ਨਿਯਮਾਂ ਅਨੁਸਾਰ ਉਪਲਬਧ ਕਰਵਾਈ ਗਈ FIR ਦੀ ਕਾਪੀ ਡਾਊਨਲੋਡ ਕਰਨ ਦੀ ਸਹੂਲਤ ਵੀ ਦਿੱਤੀ ਗਈ ਹੈ। ‘ਸਤਰਕ-ਹਰਿਆਣਾ’ ਐਪ ਇਸ ਸਮੇਂ Google Play Store ’ਤੇ ਉਪਲਬਧ ਹੈ। ਸਰਕਾਰ ਮੁਤਾਬਕ ਵਰਤੋਂ ਅਤੇ ਨਤੀਜਿਆਂ ਦੇ ਆਧਾਰ ’ਤੇ ਇਸ ਨੂੰ ਜਲਦ Apple App Store ’ਤੇ ਵੀ ਉਪਲਬਧ ਕਰਵਾਇਆ ਜਾਵੇਗਾ।

‘ਸਿਰਫ਼ ਤੱਥਾਂ ’ਤੇ ਆਧਾਰਿਤ ਜਾਣਕਾਰੀ ਹੀ ਅਪਲੋਡ ਕਰੋ’

SV&ACB ਦੇ ਮੁਖੀ ਡਾ. ਅਰਸ਼ਿੰਦਰ ਸਿੰਘ ਚਾਵਲਾ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਐਪ ਦੀ ਵਰਤੋਂ ਸਿਰਫ਼ ਸਹੀ, ਅਸਲ ਅਤੇ ਤੱਥਾਂ ’ਤੇ ਆਧਾਰਿਤ ਜਾਣਕਾਰੀ ਸਾਂਝੀ ਕਰਨ ਲਈ ਕੀਤੀ ਜਾਵੇ।

ਉਨ੍ਹਾਂ ਕਿਹਾ ਕਿ ਬਿਨਾਂ ਕਿਸੇ ਤੱਥ ਜਾਂ ਆਧਾਰ ਦੇ ਕਿਸੇ ਅਧਿਕਾਰੀ ਜਾਂ ਕਰਮਚਾਰੀ ਨੂੰ ਬਦਨਾਮ ਕਰਨ ਲਈ ਗੁੰਮਰਾਹਕੁੰਨ ਜਾਣਕਾਰੀ ਅਪਲੋਡ ਨਾ ਕੀਤੀ ਜਾਵੇ। ਉਨ੍ਹਾਂ ਇਹ ਵੀ ਸਪੱਸ਼ਟ ਕੀਤਾ ਕਿ ਜੇਕਰ ਕੋਈ ਵਿਅਕਤੀ ਜਾਣਬੁੱਝ ਕੇ ਗਲਤ ਜਾਂ ਨਕਲੀ ਸਮੱਗਰੀ, ਜਿਸ ਵਿੱਚ AI ਰਾਹੀਂ ਤਿਆਰ ਕੀਤੀ ਗਈ ਫਰਜ਼ੀ ਸਮੱਗਰੀ ਵੀ ਸ਼ਾਮਲ ਹੈ, ਨੂੰ ਅਸਲ ਜਾਣਕਾਰੀ ਵਜੋਂ ਅਪਲੋਡ ਕਰਦਾ ਹੈ ਤਾਂ ਉਸ ਖ਼ਿਲਾਫ਼ ਨਿਯਮਾਂ ਅਨੁਸਾਰ ਕਾਰਵਾਈ ਕੀਤੀ ਜਾ ਸਕਦੀ ਹੈ।

ਮੁੱਖ ਮੰਤਰੀ ਦੇ ਨਾਲ ਇਸ ਮੌਕੇ ਵਧੀਕ ਪ੍ਰਧਾਨ ਸਕੱਤਰ ਯਸ਼ਪਾਲ ਯਾਦਵ ਸਮੇਤ ਹੋਰ ਅਧਿਕਾਰੀ ਵੀ ਮੌਜੂਦ ਸਨ।