SEMICON India 2026: ਦੁਨੀਆ ਦੀਆਂ ਵੱਡੀਆਂ ਸੈਮੀਕੰਡਕਟਰ ਕੰਪਨੀਆਂ ਦਾ ਭਾਰਤ ’ਚ ਨਿਵੇਸ਼ ਵੱਲ ਰੁਝਾਨ, 56 ਸਮਝੌਤਿਆਂ ਨਾਲ ਬਦਲੇਗੀ ਚਿਪ ਇੰਡਸਟਰੀ ਦੀ ਤਸਵੀਰ

ਨਵੀਂ ਦਿੱਲੀ: ਭਾਰਤ ਵਿੱਚ ਸੈਮੀਕੰਡਕਟਰ ਉਦਯੋਗ ਨੂੰ ਵਧਾਵਾ ਦੇਣ ਦੀਆਂ ਕੋਸ਼ਿਸ਼ਾਂ ਨੂੰ SEMICON India 2026 ਦੌਰਾਨ ਵੱਡਾ ਹੁਲਾਰਾ ਮਿਲਿਆ ਹੈ। ਦੁਨੀਆ ਦੀਆਂ ਕਈ ਪ੍ਰਮੁੱਖ ਸੈਮੀਕੰਡਕਟਰ ਕੰਪਨੀਆਂ ਨੇ ਭਾਰਤ ਵਿੱਚ ਆਪਣੇ ਕਾਰੋਬਾਰ ਅਤੇ ਨਿਵੇਸ਼ ਦਾ ਵਿਸਤਾਰ ਕਰਨ ਵਿੱਚ ਦਿਲਚਸਪੀ ਦਿਖਾਈ ਹੈ।

ਗਲੋਬਲ ਕੰਪਨੀਆਂ ਭਾਰਤ ਦੇ ਹੁਨਰਮੰਦ ਮਨੁੱਖੀ ਸਰੋਤ ਅਤੇ ਕੇਂਦਰ ਤੇ ਸੂਬਾ ਸਰਕਾਰਾਂ ਦੀਆਂ ਨੀਤੀਆਂ ਦਾ ਲਾਭ ਲੈਂਦਿਆਂ ਦੇਸ਼ ਵਿੱਚ ਸੈਮੀਕੰਡਕਟਰ ਨਿਰਮਾਣ ਅਤੇ ਸਪਲਾਈ ਚੇਨ ਵਿਕਸਤ ਕਰਨ ਦੀਆਂ ਸੰਭਾਵਨਾਵਾਂ ਦੀ ਪੜਚੋਲ ਕਰ ਰਹੀਆਂ ਹਨ।

ASML ਨੇ ਭਾਰਤ ਵਿੱਚ ਖੋਲ੍ਹਿਆ ਦਫ਼ਤਰ

ਪ੍ਰਮੁੱਖ ਲਿਥੋਗ੍ਰਾਫੀ ਉਪਕਰਣ ਨਿਰਮਾਤਾ ASML ਨੇ ਭਾਰਤ ਵਿੱਚ ਆਪਣਾ ਦਫ਼ਤਰ ਸਥਾਪਤ ਕੀਤਾ ਹੈ। ਕੰਪਨੀ ਨੂੰ ਉਮੀਦ ਹੈ ਕਿ ਆਉਣ ਵਾਲੇ ਸਮੇਂ ਵਿੱਚ ਉਸਦੇ ਹੋਰ ਗਾਹਕ ਵੀ ਭਾਰਤ ਵਿੱਚ ਆਪਣੀਆਂ ਨਿਰਮਾਣ ਸਹੂਲਤਾਂ ਸਥਾਪਤ ਕਰਨਗੇ।

ASML ਦੇ ਮੁੱਖ ਰਣਨੀਤਕ ਸੋਰਸਿੰਗ ਅਤੇ ਪ੍ਰਾਪਤੀ ਅਧਿਕਾਰੀ ਐਲਨ ਵੇਨ ਨੇ ਕਿਹਾ ਕਿ ਟਾਟਾ ਇਲੈਕਟ੍ਰਾਨਿਕਸ ਭਾਰਤ ਵਿੱਚ 300mm ਸੈਮੀਕੰਡਕਟਰ ਫੈਬ ਸਥਾਪਤ ਕਰਨ ਵਾਲੀ ਪਹਿਲੀ ਕੰਪਨੀ ਹੈ, ਜਿਸਦੀ ਉਤਪਾਦਨ ਸਮਰੱਥਾ ਪ੍ਰਤੀ ਮਹੀਨਾ 50,000 ਵੇਫਰ ਦੱਸੀ ਗਈ ਹੈ।

ਉਨ੍ਹਾਂ ਕਿਹਾ ਕਿ ਜੇ ਭਾਰਤ ਵਿੱਚ ਸੈਮੀਕੰਡਕਟਰ ਨਿਰਮਾਣ ਨੂੰ ਵੱਡੇ ਪੱਧਰ ’ਤੇ ਵਿਕਸਤ ਕਰਨਾ ਹੈ ਤਾਂ ਦੇਸ਼ ਵਿੱਚ ਕਈ ਫੈਬ ਯੂਨਿਟਾਂ ਦੀ ਲੋੜ ਹੋਵੇਗੀ।

ਭਾਰਤ ਦਾ ਘਰੇਲੂ ਸੈਮੀਕੰਡਕਟਰ ਉਤਪਾਦਨ ਵਧਾਉਣ ਦਾ ਟੀਚਾ

ਉਦਯੋਗ ਮਾਹਰਾਂ ਮੁਤਾਬਕ ASML ਦੇ ਉਪਕਰਣ ਦੁਨੀਆ ਭਰ ਵਿੱਚ ਚਿਪ ਨਿਰਮਾਣ ਪ੍ਰਕਿਰਿਆ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ। ਕੰਪਨੀ ਮੁਤਾਬਕ ਭਾਰਤ ਵਿੱਚ ਮੌਜੂਦ ਹੁਨਰਮੰਦ ਪ੍ਰਤਿਭਾ ਵੀ ਇਸ ਖੇਤਰ ਵਿੱਚ ਕੰਪਨੀਆਂ ਲਈ ਇੱਕ ਮਹੱਤਵਪੂਰਨ ਕਾਰਕ ਹੈ।

ਭਾਰਤ ਨੇ 2032 ਤੱਕ ਆਪਣੀ ਘਰੇਲੂ ਸੈਮੀਕੰਡਕਟਰ ਮੰਗ ਦੇ 15 ਤੋਂ 25 ਫ਼ੀਸਦੀ ਹਿੱਸੇ ਨੂੰ ਦੇਸ਼ ਵਿੱਚ ਤਿਆਰ ਕੀਤੇ ਵੇਫਰਾਂ ਰਾਹੀਂ ਪੂਰਾ ਕਰਨ ਦਾ ਟੀਚਾ ਰੱਖਿਆ ਹੈ। ਇਸ ਲਈ ਆਉਣ ਵਾਲੇ ਸਾਲਾਂ ਵਿੱਚ ਕਈ ਸੈਮੀਕੰਡਕਟਰ ਫੈਬ ਸਥਾਪਤ ਹੋਣ ਦੀ ਉਮੀਦ ਹੈ।

ਸਰਕਾਰ ਨੇ ਸੈਮੀਕੰਡਕਟਰ ਖੇਤਰ ਦੇ ਅਗਲੇ ਪੜਾਅ ਲਈ SEMICON 2.0 ਯੋਜਨਾ ਦਾ ਐਲਾਨ ਕੀਤਾ ਹੈ। ਇਸ ਤਹਿਤ ਲਗਭਗ 1.27 ਲੱਖ ਕਰੋੜ ਰੁਪਏ ਦੇ ਪ੍ਰੋਤਸਾਹਨ ਦੀ ਵਿਵਸਥਾ ਕੀਤੀ ਗਈ ਹੈ।

ਕੇਂਦਰੀ ਇਲੈਕਟ੍ਰਾਨਿਕਸ ਅਤੇ ਸੂਚਨਾ ਤਕਨਾਲੋਜੀ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਕਿਹਾ ਕਿ ਇਸ ਯੋਜਨਾ ਤਹਿਤ ਚਿਪ ਉਤਪਾਦਨ ਨਾਲ ਸਬੰਧਤ ਲਗਭਗ 12 ਬਿਲੀਅਨ ਡਾਲਰ ਦੇ ਨਿਵੇਸ਼ ਪ੍ਰਸਤਾਵਾਂ ਦੀ ਉਮੀਦ ਹੈ।

Applied Materials ਦਾ 5 ਬਿਲੀਅਨ ਡਾਲਰ ਨਿਵੇਸ਼

ਸੈਮੀਕੰਡਕਟਰ ਉਪਕਰਣ ਨਿਰਮਾਤਾ Applied Materials ਨੇ SEMICON India 2026 ਦੌਰਾਨ ਅਗਲੇ 10 ਸਾਲਾਂ ਵਿੱਚ ਭਾਰਤ ਵਿੱਚ 5 ਬਿਲੀਅਨ ਡਾਲਰ, ਯਾਨੀ ਲਗਭਗ 48,000 ਕਰੋੜ ਰੁਪਏ ਦੇ ਨਿਵੇਸ਼ ਦੀ ਵਚਨਬੱਧਤਾ ਜਤਾਈ।

ਇਸ ਤੋਂ ਇੱਕ ਦਿਨ ਪਹਿਲਾਂ ਕੰਪਨੀ ਨੇ ਕਰਨਾਟਕ ਸਰਕਾਰ ਨਾਲ ਚਿੱਪ ਨਿਰਮਾਣ ਵਿੱਚ ਵਰਤੇ ਜਾਣ ਵਾਲੇ ਉਪਕਰਣਾਂ ਦੀ ਖੋਜ, ਵਿਕਾਸ ਅਤੇ ਉਤਪਾਦਨ ਲਈ 3,600 ਕਰੋੜ ਰੁਪਏ ਦੇ ਨਿਵੇਸ਼ ਸਬੰਧੀ ਸਮਝੌਤਾ ਕੀਤਾ ਸੀ।

ਇਸੇ ਖੇਤਰ ਦੀ ਕੰਪਨੀ Lam Research ਨੇ ਵੀ ਭਾਰਤ ਵਿੱਚ ਸਿਲੀਕਾਨ ਕੰਪੋਨੈਂਟ ਪਲਾਂਟ ਸਥਾਪਤ ਕਰਨ ਲਈ 10,000 ਕਰੋੜ ਰੁਪਏ ਦੇ ਨਿਵੇਸ਼ ਦਾ ਐਲਾਨ ਕੀਤਾ ਹੈ।

ਤਿੰਨ ਦਿਨਾਂ ਵਿੱਚ ਕਰੀਬ 56 ਸਮਝੌਤੇ

SEMICON India 2026 ਦੇ ਤਿੰਨ ਦਿਨਾਂ ਸਮਾਗਮ ਦੌਰਾਨ ਲਗਭਗ 56 ਸਮਝੌਤਿਆਂ (MoUs) ’ਤੇ ਦਸਤਖ਼ਤ ਕੀਤੇ ਗਏ।

ਟਾਟਾ ਇਲੈਕਟ੍ਰਾਨਿਕਸ ਨੇ ਗੁਜਰਾਤ ਦੇ ਧੋਲੇਰਾ ਵਿੱਚ ਚਿੱਪ ਨਿਰਮਾਣ ਸਹੂਲਤ ਅਤੇ ਅਸਾਮ ਵਿੱਚ ਚਿੱਪ ਅਸੈਂਬਲੀ ਤੇ ਟੈਸਟਿੰਗ ਸਹੂਲਤ ਸਥਾਪਤ ਕਰਨ ਲਈ ਆਪਣੇ 1.18 ਲੱਖ ਕਰੋੜ ਰੁਪਏ ਦੇ ਨਿਵੇਸ਼ ਨਾਲ ਜੁੜੇ ਸਪਲਾਇਰਾਂ ਨਾਲ 16 ਸਮਝੌਤੇ ਕੀਤੇ ਹਨ।

ਕੰਪਨੀ ਧੋਲੇਰਾ ਵਿੱਚ 363 ਏਕੜ ਦਾ ਉਦਯੋਗਿਕ ਪਾਰਕ ਵੀ ਵਿਕਸਤ ਕਰ ਰਹੀ ਹੈ। ਇਸ ਵਿੱਚ ਆਪਣੇ ਪਲਾਂਟ ਲਈ ਲੋੜੀਂਦੇ ਲਗਭਗ 450 ਵਿਕਰੇਤਾਵਾਂ ਨੂੰ ਸ਼ਾਮਲ ਕਰਨ ਦੀ ਯੋਜਨਾ ਹੈ।

ਭਾਰਤੀ ਚਿਪ-ਡਿਜ਼ਾਈਨ ਕੰਪਨੀਆਂ ਵੀ ਵਧਾ ਰਹੀਆਂ ਕਾਰੋਬਾਰ

SEMICON India 2026 ਵਿੱਚ ਭਾਰਤ ਦੀਆਂ ਘਰੇਲੂ ਚਿਪ-ਡਿਜ਼ਾਈਨ ਕੰਪਨੀਆਂ ਨੇ ਵੀ ਆਪਣੀਆਂ ਭਵਿੱਖੀ ਯੋਜਨਾਵਾਂ ਪੇਸ਼ ਕੀਤੀਆਂ।

L&T Semiconductor Technologies, IndeseMi, Axiro ਅਤੇ Ahisa Digital Innovations ਸਮੇਤ ਕਈ ਕੰਪਨੀਆਂ ਨੇ ਵਪਾਰਕ ਚਿਪ ਉਤਪਾਦਨ ਅਤੇ ਆਪਣੇ ਕਾਰੋਬਾਰ ਨੂੰ ਵਧਾਉਣ ਦੀਆਂ ਯੋਜਨਾਵਾਂ ਦਾ ਐਲਾਨ ਕੀਤਾ।

ਸਰਕਾਰ ਦਾ ਉਦੇਸ਼ SEMICON 2.0 ਦੇ ਅਗਲੇ ਪੜਾਅ ਤਹਿਤ ਭਾਰਤ ਵਿੱਚ ਘੱਟੋ-ਘੱਟ 200 ਸਟਾਰਟਅੱਪਸ ਅਤੇ ਚਿਪ ਡਿਜ਼ਾਈਨ ਕਰਨ ਵਾਲੀਆਂ ਕੰਪਨੀਆਂ ਨੂੰ ਉਤਸ਼ਾਹਿਤ ਕਰਨਾ ਹੈ।

51 ਹਜ਼ਾਰ ਤੋਂ ਵੱਧ ਰਜਿਸਟ੍ਰੇਸ਼ਨ

SEMICON India 2026 ਨੂੰ ਉਦਯੋਗ ਜਗਤ ਵੱਲੋਂ ਵੱਡਾ ਹੁੰਗਾਰਾ ਮਿਲਿਆ। ਸਮਾਗਮ ਲਈ 51,000 ਤੋਂ ਵੱਧ ਰਜਿਸਟ੍ਰੇਸ਼ਨ ਹੋਏ ਅਤੇ ਲਗਭਗ 40,000 ਲੋਕਾਂ ਨੇ ਹਿੱਸਾ ਲਿਆ।

ਇਸ ਤੋਂ ਇਲਾਵਾ 600 ਤੋਂ ਵੱਧ ਪ੍ਰਦਰਸ਼ਕਾਂ ਨੇ ਆਪਣੀਆਂ ਤਕਨਾਲੋਜੀਆਂ ਅਤੇ ਉਤਪਾਦ ਪੇਸ਼ ਕੀਤੇ। ਸਮਾਗਮ ਵਿੱਚ ਲਗਭਗ 300 ਅੰਤਰਰਾਸ਼ਟਰੀ ਕੰਪਨੀਆਂ ਦੀ ਭਾਗੀਦਾਰੀ ਰਹੀ। ਇਸ ਨਾਲ ਭਾਰਤ ਵਿੱਚ ਸੈਮੀਕੰਡਕਟਰ ਨਿਰਮਾਣ, ਚਿਪ ਡਿਜ਼ਾਈਨ ਅਤੇ ਸਪਲਾਈ ਚੇਨ ਦੇ ਵਿਸਤਾਰ ਨੂੰ ਲੈ ਕੇ ਗਲੋਬਲ ਕੰਪਨੀਆਂ ਦੀ ਵਧ ਰਹੀ ਦਿਲਚਸਪੀ ਸਾਹਮਣੇ ਆਈ ਹੈ।